As súas Maxestades os Reis Magos visitarán Cabanas este venres e sábado

Galego

Realizarán un percorrido por todo o municipio o venres e, o sábado, repartirán agasallos no pavillón de Lavandeira e no local social de Laraxe

Cabanas, 3 de xaneiro de 2018. As súas Maxestades os Reis Magos de Oriente visitarán o municipio por partida dobre. Será este venres e sábado, en sendas actividades organizadas pola ACR Cabalgata de Reyes de Cabanas, en colaboración co Concello.

Na primeira xornada, realizarán un percorrido por todo o termo municipal. Partirán de Campolongo ás catro e media do serán e pasarán pola praia de Cabanas, a casa consistorial, o local social de Lavandeira, Santa Cruz, a residencia da Terceira Idade de Laraxe, o local social de San Martiño do Porto e, por último, regresarán ó punto de partida. Para cubrir o itinerario, que seguirán de cerca os voluntarios de Protección Civil, tomarán a estrada N651 polas zonas da AC141, AC564, AC1502 e AC122.

Tras visitar pola noite todas as casas de Cabanas, o día 6 achegaranse ata o pavillón de Lavandeira procedentes de Campolongo (deste punto sairán ás 11 horas) e, nestas instalacións municipais, repartirán xoguetes durante hora e media. De aí, acudirán ó local social de Laraxe, onde farán o propio antes de despedirse ata o próximo ano.

Tags: