Inicio

Aprobación inicial do Plan Xeral de Ordenación Municipal
  • Xoves, 30 Xaneiro 2014

O Pleno da Corporación Municipal do Concello de Cabanas aprobou onte de forma inicial o Plan Xeral de Ordenación Municipal (PXOM), que en breve pasará a estar a disposición pública para que os interesados o poidan revisar e presentar no caso de consideralo oportuno as alegacións que consideren oportunas. O documento pasará a ser público o próximo 27 de febreiro de 2014 e o prazo para a súa revisión será de dous meses, ate o 27 de abril. Os interesados en acceder ó documento poderano facer no Salón de Plenos do Concello Vello en horario de 09:00 a 14:00 horas.

Ademais desta exposición pública, o Concello de Cabanas ten previsto levar a cabo unha serie de xuntanzas nos diferentes locais sociais do municipio para que deste xeito o equipo redactor do PXOM, a U.T.E. De Vega-Proyestegal, poidan explicalo e atender as dúbidas que se lles presenten. A primeira destas xuntas terá lugar no local da S.C.D.R. San Mamede de Laraxe o día 26 de febreiro. As seguintes serán na A.VV. de Lavandeira, o 27 de febreiro e no local do C.C.R.D. San Martín de Porto o 28 de febreiro. Tamén o local da A.VV. de Santa Cruz acollerá unha destas xuntanzas o día 7 de marzo e o propio salón de plenos do Concello será escenario de dúas delas, a primeira o 6 de marzo e a segunda o 15 de abril. O horario previsto para todas elas será as 20:30 horas.

Pero non só se levarán a cabo estas xuntanzas, senón que tamén o equipo redactor estará a disposición dos interesados para dar asistencia técnica. Os días 26, 27 e 28 de febreiro, o 6 e 7 de marzo e o 15 de abril no Salón de Plenos do Concello Vello o farán en horario de 10:00 a 14:00 horas e logo de 17:00 a 20:00 horas. Tamén estarán os días 11, 14, 18, 21, 25 e 28 de marzo e 1, 4, 8, 11, 21, 22, 23 e 24 de abril pero só en horario de 10:00 a 14:00 horas.

I Regata Amigable Concello de Cabanas
  • Martes, 28 Xaneiro 2014

A Praia da Madelana de Cabanas convertiuse durante este pasado domingo no centro de interese do kayak de Galicia. O Clube KDM xunto co propio Concello de Cabanas levaron a cabo a I Regata Amigable Concello de Cabanas. A proba, que deu comezo ás dez da mañá, serviu para concentrar no municipio a máis de cento vinte palistas procedentes de clubes de toda Galicia. Na entrega de premios, ademais do Alcalde de Cabanas, Germán Castrillón, estivo tamén presente a Vicepresidente da Deputación da Coruña, Mariel Padín.

No tocante ós resultados, na categoría de kayak senior masculino o vencedor foi José Estévez, do Náutico Pontecesures, seguido no podium por Jesús Rodríguez do Fluvial O Barco e Adrián Carpe do Náutico de Miño. En categoría femenina a vencedora foi Laura Pérez do Náutico de Miño. En canoa senior o gañador foi o palista do Ría de Betanzos José David Mosquera. En Kayak Veterano A o gañador foi Adolgo Monteagudo de As Xuvias, sendo segundo Daniel Feijo e terceiro Ernesto Gancedo, ambos do Xuvenil. Nesta clase en categoría femenina a gañadora foi María del Carmen Bueno del Muros-Noia.
En Kayak Veterano B o vencedor foi Francisco Vázquez do Fluvial O Barco, segundo foi Alejandro Paredes de As Xuvias e Manuel Pedreira terceiro, tamén de As Xuvias. En categoría femenina a gañadora foi Maribel Prieto de As Xuvias.

Tamén do clubes As Xuvias foron Carlos Castro e Alejandro Pedreira, primeiro e segundo en Kayak Xuvenil masculino, sendo terceiro Miguel Blanco do Narón. No tocante a Kayak Cadete 1ª masculino o vencedor foi Víctor Álvarez do Cambados en en femenino Nerea López do KDM Cabanas. En 2ª o vencedor foi Miguel Ángel Pérez do Cambados e María Suárez do Muros-Noia mentres que en canoa o premio foi para José Sánchez do Ría de Betanzos.
En categoría Infantil A de kayak os gañadores foron Iván Fernandez do Ría de Betanzos e Tamara Fernández do Cambados, en Infantil B foron Roberto Piñeiro do Cambados e Antía Fernández do Betanzos e en canoa Mario Rey do Betanzos. En Alevín A proclamouse vencedor Jorge Suárez do Betanzos e Antía Casanova do Náutico de Miño, en Alevín B foron Roberto Piñeiro do Cambados e Antía Fernández do Betanzos. Xa para rematar, en categoría Benxamín os gañadores foron Joel Fernández do KDM Cabanas e Celia Durán do Xuvenil.

Campaña de Esquí 2014
  • Martes, 21 Xaneiro 2014

O prazo para a preinscrición na Campaña de Esquí que a Deputación da Coruña vai levar a cabo este ano xa está aberta. Por medio deste programa facilitarase que nenos e nenas de toda a provincia nados entre os anos 2000 e 2003 teñan a posibilidade de practicar este deporte na estación invernal de San Isidro, en León. Este prazo de preinscrición rematará o día 28 de xaneiro. Os participantes do Concello de Cabanas está previsto que tomen parte na actividade na primeira quenda, entre o 14 e o 16 de febreiro.

Cada participante deberá aboar unha cota única de 36 euros, facéndose cargo a Deputación da Coruña do resto dos gastos nos que se inclúe o aloxamento e manutención así como os cursos de esquí. No caso de que o número de solicitantes supere as prazas das que disporá o Concello de Cabanas, estas asignaranse por medio dun sorteo público.

Para formalizar a preinscrición os interesados poden dirixirse ó departamento de Cultura e Deportes do concello de Cabanas, ou ben recadar máis información, ben a través do teléfono 981 49 59 59 ben no correo electrónico cultura@cabanas.es

O Magosto
  • Mércores, 06 Novembro 2013

Como ven sendo habitual por estas datas, o Concello de Cabanas organizará unha nova edición do seu tradicional Magosto. A data escollida nesta ocasión para a súa celebración será o venres 8 de novembro. O lugar no que terá lugar será fronte á casa consistorial a partir das 19:30 horas.

Nesta ocasión, quen se achegue a celebrar o Magosto en Cabanas poderá por tan só tres euros dispoñer dunha ración de castañas asadas xunto cun bolo preñado e unha cunca de queimada. Os nenos que veñan a festa terán a posibilidade de tomar as castañas e os bolos de forma gratuíta. Esta festa do Magosto contará coa amenización musical a cargo do dúo Maracaibo.

Tempo de Familias
  • Martes, 05 Novembro 2013

Un ano máis e a través dos Servizos Sociais e o seu programa de Educación Familiar, o Concello de Cabanas porá en marcha unha nova edición de “Tempo de Familias. Compartindo Experiencias”. A primeira das sesións desta actividade terá lugar este mesmo xoves, 7 de novembro e a mesma está dirixido a familias con bebes e nenos e nenas con ata cinco anos de idade. O lugar escollido para esta será o Antigo Concello de Cabanas, ás 17:00 horas. Posteriormente levaranse a cabo o resto de sesións cunha periodicidade quincenal ate o remate do curso escolar.

Con esta actividade búscase sobre todo asesorar ás familias e responder as súas dúbidas, facendo entender que os primeiros anos son fundamentais na formación da persoa e a importancia de facer unha estimulación axeitada en cada unha das fases do crecemento. Nas diferentes sesións que se realizarán ó longo do curso, ofreceráselles ás familias ideas, recursos e ferramentas que sirvan para dar apoio e reforzar ás persoas que se ocupan da crianza dos nenos e nenas.

Aquelas persoas que estivesen interesadas en participar neste programa inda teñen tempo de formalizar a súa inscrición ou recadar máis información. Para iso non teñen máis que poñerse en contacto cos Servizos Sociais do Concello de Cabanas no teléfono 981 49 59 59 extensión 2.

Páxinas